Feb 13, 2017

Zitto Amtaka Rais Magufuli Avunje Bunge

Mbunge wa Kigoma Mjini Zitto Kabwe amemshauri Rais wa Tanzania Dkt. John Magufuli kulivunja Bunge la Jamhuri ya Muungano wa Tanzania endapo analiona ni kikwazo kwake.

Ushauri huo ameutoa jana ikiwa ni saa chache baada ya Rais Magufuli kukosoa uamuzi wa Bunge kumuita Mkuu wa Mkoa wa Dar es Salaam Paul Makonda kujieleza mbele ya Kamati ya Bunge, kutokana na kilichodaiwa na wabunge kuwa ni kauli ya kulidhalilisha Bunge.

Katika hotuba yake aliyoitoa jana wakati wa kuapishwa kwa Kamishna Mkuu wa Mamlaka ya Kuzuia na Kupambana na Dawa za Kulevya, Rais Magufuli aliwataka viongozi wengine kumuunga mkono mtu anayejitokeza kupiga vita dawa za kulevya badala ya kumdhalilisha.

"Tunapomuona mtu anajitokeza kupambana na haya madawa ya kulevya, badala ya kumdhalilisha tumuombee na kumtia moyo, hawa wanaweza hata kubadilisha maneno uliyoyazungumza wakabadilisha wakatengeneza kwenye clip wakatupa, na wakajitokeza wengine wakasema wameingilia mamlaka yao, wakati wao wanaingilia mamlaka ya kuwaita wengine, hii ni vita". Alisema Magufuli

Baada ya kauli hiyo ya Rais, Zitto kupitia ukurasa wake wa Facebook ameonesha kushangazwa na kile alichodai  kuwa Rais hakujua kuwa sheria ya kuundwa kwa mamlaka hiyo, ilitungwa, na kwamba anashangaa kuona Rais hakuwa akijua kuwa alipaswa kumteua Kamishna Mkuu wa Mamlaka hiyo

Ujumbe wa Zitto unasema
"Wabunge walitoa Hoja Binafsi kuhusu Madawa ya kulevya ( Esther Bulaya na Faustine Ndugulile ) na kufuatia hoja hiyo Serikali ikaleta Muswada bungeni na Bunge likatunga Sheria ya Kupambana na Madawa ya kulevya mwaka 2015.

"Serikali mpya ikaingia madarakani mwezi Novemba 2015. February 2017 Ndio Kamishna Mkuu anateuliwa tena baada ya wabunge kuhoji na kushinikiza kupitia Kamati husika na pia mbunge Esther Bulaya aliyetoa Hoja Binafsi katika Bunge la Kumi.

"Rais anasema hakuwa anajua kuwa sheria hiyo ipo. Lakini Rais anapogawa Wizara huwa anatoa instruments na Hizo instruments hutaja kila sheria kwa kila Waziri. Ilikuwaje Rais akasahau sheria hii nyeti kama alikuwa na nia ya dhati ya Kupambana na Madawa ya kulevya?

Rais anaona Bunge kikwazo kwa sababu Bunge linamwongoza afuate sheria. Lakini Kama anaona Bunge linamkera turudi kwenye uchaguzi tu, alivunje".
Read More

Manji, Gwajima wamkera Rais Magufuli

Rais wa Jamhuri ya Muungano wa Dar es Salaam, Dkt John Pombe Magufuli amekerwa na kitendo cha watu kwenda Kituo Kikuu Polisi (Central) na kuanza kuosha gari la mtuhumiwa huku wengine wakienda na kwaya katika eneo hilo.

Rais Magufuli ameyasema hayo wakati wa kuwaapisha maafisa mbalimbali huku akiwaagiza kuchapa kazi bila kumuogopa mtu yeyote. Tukio hilo lilitokea Alhamisi iliyopita wakati mwenyekiti wa Klabu ya Yanga, Yusuf Manji alipokwenda kuripoti polisi na baadhi ya mashabiki wake kuosha gari lake lililokuwa limeegeshwa katika kituo hicho.

Wengine wanaoaminika kuwa ni wanakwaya wa Kanisa la Ufufuo na uzima linaloongozwa Askofu Josephat Gwajima walifika eneo hilo wakati kiongozi wao alipokwenda kuhojiwa huku wakiimba nyimbo mbalimbali.

“Sitaki kuona tena wananchi wanajazana kituo cha polisi watuhumiwa wanapohojiwa. Lazima tujenge nidhamu, mbona hawakwenda Lugalo kwa CDF (Mkuu wa Majeshi) kuimba kwaya?” amesema Rais Magufuli huku akimuagiza Kamishna wa Polisi Kanda Maalumu ya Dar es Salaam, Simon Sirro kuwa mkali.
Read More

Masaa 72 ya Askofu Gwajima Mahabusu kuhusu tuhuma za dawa za kulevya

Askofu Mkuu wa Kanisa la Ufufuo na Uzima, Josephat Gwajima, amemuomba Rais John Magufuli kuingilia kati sakata la kutangaza na kushikiliwa Kituo Kikuu cha Polisi Dar es Salaam watu wanaotuhumiwa kujihusisha na dawa za kulevya.

Pia alieleza kushangazwa kwake na baadhi ya wawekezaji na wafanyabiashara wakubwa nchini kuingizwa katika sakata hilo hata kabla uchunguzi kufanyika.

Gwajima ambaye alikuwa ameshikiliwa Kituo Kikuu cha Polisi Dar es Salaam alikokwenda baada ya kutangazwa na Mkuu wa Mkoa wa Dar es Salaam, Paul Makonda, akituhumiwa kujihusisha na dawa za kulevya, alisema hana mpango wa kumshtaki mkuu huyo wa mkoa.

Askofu Gwajima alisema badala yake anakata rufaa kwa Rais Magufuli akimtaka kufuatilia tuhuma hizo kwa undani kwa watu wanaoendelea kushikiliwa na Jeshi la Polisi ili waweze kupata haki.

Akizungumza kanisani kwake Dar es Salaam jana, Gwajima alisema alishikiliwa na Jeshi la Polisi Mkoa wa Dar es Salaam baada ya kwenda kuitikia mwito uliotolewa na Makonda kwa ajili ya kutoa ushirikiano kuhusu tuhuma za dawa za kulevya

Alisema baada ya kufika kituoni hapo na kufanyiwa mahojiano alikutana na mfanyabishara na Diwani wa Mbagala Kuu, Yusuph Manji ambaye naye alikuwa amefika kituoni hapo kwa ajili ya kuitika mwito huo wa Makonda.

"Kwenye chumba changu tulikuwa mimi na Yusuph Manji, huyu ana kampuni zaidi ya 23 ameajiri Watanzania zaidi ya 5,000, sasa mtu kama huyo imeshindikanaje kumuita kwa kumpelekea hati ya kuitwa kuhojiwa, badala yake anatangazwa?"

"Imeshindikanaje mtu kama Manji kumuita kwa kumuandikia barua ili aende ahojiwe na ikigundulika achukuliwe hatua, kwa nini atangazwe kabla ya kuchukuliwa hatua?  Ilipaswa aandikiwe barua ya wito kisha uchunguzi ufanyike na kama akibainika ndiyo achukuliwe hatua, ila kwa sababu mkuu wa mkoa hakuwa na nia nzuri hata kwa Manji ndiyo maana hakufanya hivyo," alisema Gwajima.

Alisema hadi alipoachiwa katika kituo hicho bado Manji alikuwa ameshikiliwa na Jeshi la Polisi, ambapo alihoji sababu ya Manji na wengine wanaoendelea kushikiliwa kituoni hapo kutofanyiwa uchunguzi na ukaguzi kama aliofanyiwa yeye ili waachiwe kama yeye au kuchukuliwa hatua kama wakibainika kujihusisha na biashara hiyo.

"Sioni sababu ya kuendelea kuwashikilia watu wale bila kuchukuliwa hatua. Kama mimi nilituhumiwa tena kwa kutangazwa lakini mwishowe ikabainika hakuna ukweli, nitaamini vipi kama wale waliobaki ndani mikononi mwa Polisi nao wanahusika?"Alihoji Gwajima.

Gwajima alisema mbali na Manji na wafanyabishara wengine waliotajwa kuhusika na biashara hiyo, wamo pia askari wa Polisi ambao nao wanatuhumiwa kujihusisha na biashara hiyo na wameendelea kushikiliwa kwa amri ya mkuu wa mkoa.

Kutokana na hali hiyo, Gwajima alisema ameamua kukata rufaa kwa Rais ili aweze kuwaangalia watu hao kwa jicho la tatu na tuhuma dhidi yao ziweze kuchunguzwa na ukweli ujulikane.

"Mheshimiwa Rais ninakuomba sana, kuna wale watu wengine ambao nilikuwa nao, ambao ni wafanyabishara na walitangazwa kama mimi, naomba uwatazame kwa macho ya huruma ili tuhuma zao zishughulikiwe, kuliko kuendelea kukaa kwenye giza chini mule, kwa niaba yao ninakata rufaa kwako naomba uwahurumie.

"Kuna askari Polisi wapo ndani kwa wiki ya pili sasa kwa amri ya Makonda, mimi naomba niwasemee leo, kama mimi imeonekana kuwa sina makosa, vipi kuhusu wao? Nampongeza mheshimiwa Rais kwa kuingia katika vita ya dawa za kulevya naomba atazame jambo hili, "alisisitiza Askofu Gwajima.

Alisema kuwa alichogundua ni kuwa Rais anahitaji msaada wake hivyo anaingia katika kazi ya kumsaidia Rais kwa maelezo kuwa inawezekana anapata taarifa zisizo za ukweli.

Gwajima alisema kuwa leo amepanga kwenda Kituo Kikuu cha Polisi kwa ajili ya kuwaona watuhumiwa wengine ambao wanaendelea kushikiliwa.

Aeleza alivyokaguliwa
Katika hatua nyingine, Gwajima alisimulia waumini wa kanisa lake namna shughuli ya ukaguzi dhidi yake ilivyoendeshwa na Jeshi la Polisi, huku akidai amechiwa baada ya kubainika tuhuma dhidi yake hazikuwa na ukweli.

Alisema baada ya kuhojiwa alielezwa anatakiwa kwenda kwa Mkemia Mkuu wa Serikali kwa ajili ya kufanyiwa vipimo ili kubaini kama anajihusisha na  utumiaji wa dawa za kulevya ama la, ikiwa ni pamoja na kufanyiwa upekuzi nyumbani kwake ambapo alieleza kuwa licha ya kufanyiwa yote hayo Polisi walifikia pia hatua ya kukagua akaunti zake za fedha.

"Kwa sababu mimi tangu kuzaliwa sijawahi kuonja mambo hayo, lakini walivyopima wakakuta hamna chochote na wakanipa fomu kuonesha hawajakuta kitu.

"Niliwaambia kwangu mkikuta hata kipisi cha sigara andikeni dawa za kulevya, tulifika kwangu nyumba yangu ina ghorofa tatu wakakagua zote na hawakukuta kitu walichotaka," alisema

Aliongeza kuwa,"wakaona haitoshi, wakahamia kwenye akaunti zangu za benki na mimi nikawaruhusu waendelee walipofanya uchunguzi wao wakabaini hakuna kitu cha kuweza kunikamatia, hawakupata kitu wakaamua kuniachia,". 

Gwajima alisema hana mpango wa kumshtaki Makonda ama kumfungulia kesi bali anajua cha kumfanya.
Read More

Ujumbe wa Dkt. Slaa kwa Gwajima kuhusu Dawa za Kulevya

Vita ya kupambana na dawa za kulevya nchini iliyopamba moto zaidi na kuzua mijadala tangu Mkuu wa Mkoa wa Dar es Salaam, Paul Makonda alipoanza kutaja majina ya watuhumiwa imemuibua Katibu Mkuu wa zamani wa Chadema, Dkt. Wilbroad Slaa.

Dkt. Slaa ameibuka baada ya kutajwa na kuhojiwa kwa Askofu wa Kanisa la Ufufuo na Uzima, Josephat Gwajima ambaye alikuwa rafiki yake na ‘muwezeshaji’ wake kabla siasa za uchaguzi mkuu wa mwaka 2015 hazijawageuza kuwa mahasimu.

Akizungumza jana kanisani kwake wakati akiwasimulia waumini wake mkasa uliompata tangu alipowasili katika kituo cha kati cha polisi jijini Dar es Salaam hadi alipoachiwa, Askofu Gwajima alisema kuwa alipokea ujumbe wa Dk. Slaa ambaye alimtetea dhidi ya tuhuma hizo.

Ujumbe wenyewe umewekwa kwenye ukurasa wa Facebook wa Askofu Gwajima.
Read More

Feb 12, 2017

Majina Ya Wanafunzi Waliopata Mkopo Baada Ya Kukata Rufaa

Bodi ya Mikopo imetangaza majina ya wanafunzi waliofanikiwa kupata mkopo baada ya kukata rufaa.


Read More

Jan 31, 2017

Matokeo ya kidato cha nne ‘CSEE 2016’

Baraza la mitihani Tanzania ‘NECTA’ limetangaza matokeo ya kidato cha nne ‘CSEE 2016’ na matokeo ya mtihani wa maarifa (QT) 2016

Kwa urahisi unaweza kuyaona matokeo ya kidato cha nne kwenye link hii ‘CSEE 2016’ >>>CSEE 2016 

Unaweza pia kuyatazama matokeo ya matokeo ya mtihani wa maarifa (QT) 2016  >>>(QT) 2016 

Read More

Jan 29, 2017

Waliofukiwa na Kifusi Wasema Wako Hai.....Watuma Majina Yao

Wakati  imeelezwa kuwa waokoaji katika mgodi wa dhahabu wa RZ Union ulioko Geita wamebakiza mita tatu kuwafikia waliofukiwa Naibu Waziri wa Nishati na Madini, Medard Kalemani akizungumza na ndugu wa watu waliofukiwa amesema kwamba wanafanya mpango wa kuwapelekea chakula wachimbaji hao.

Amesema kwamba jana wamefanikiwa kufanya mawasiliano na wachimbaji hao na kwamba wapo kumi na watano na kuwa wanachohitaji kwa sasa ni chakula.

Alisema waokoaji walifanikiwa kuwafikishia kamba na kalamu watu hao ambao waliandika majina  na  mahitaji yao na kusema kwamba wote wapo salama.

Watu hao akiwemo raia wa China mmoja walifukiwa na kifusi juzi usiku baada ya udongo kukatika na kuziba mlango waliokuwa wakitumia kuingia na kutoka na uokoaji unaendelea kwa kushirikiana na vyombo mbalimbali vya uokoaji.

Watu wengi wapo katika eneo hilo wakiwemo ndugu wa waliofukiwa lakini kwa juhudi wanazoziona za uokoaji wametulia na kufuata maelekezo wanayopewa ikiwemo kukaa mita 500 toka eneo la tukio.
Read More

Jan 17, 2017

Serikali yaanza kusambaza chakula

SERIKALI imeruhusu nafaka iliyohifadhiwa kwenye maghala ya Wakala wa Taifa wa Hifadhi ya Chakula (NFRA) iuzwe ili kukabiliana na mfumuko wa bei nchini.

Waziri Mkuu, Kassim Majaliwa, alitoa tamko hilo wakati akizungumza na waandishi wa habari mjini Dodoma jana, baada ya kuzindua safari za Shirika la Ndege la ATCL kati ya mikoa ya Dar es Salaam na Dodoma.

Majaliwa alisema taarifa ambazo zimekuwa zinatolewa kuhusu hali ya chakula nchini si sahihi kwa kuwa serikali ndiyo yenye jukumu la kutoa taarifa ya hali halisi na si vinginevyo.

Hata hivyo, Waziri Mkuu alikiri kupanda kwa bei ya baadhi ya mazao akieleza kuwa kumetokana na mahitaji ya chakula yaliyopo katika nchi za jirani ambazo zinategemea kupata chakula kutoka nchini.

“Nataka kuwaondoa hofu Watanzania kwamba kelele zinazopigwa na watu mbalimbali kuhusu hali ya chakula nchini siyo sahihi, Serikali ndiyo inajukumu ya kutangaza hali ya chakula, iwe ni mbaya au nzuri,” alisema Majaliwa.

“Tunataka kuhakikishia Watanzania msimu uliopita wa kilimo tulivuna chakula kingi na tulikuwa na ziada ya tani milioni tatu na ilipofikia mwezi wa 10 (Oktoba) mwaka jana, Watanzania wakiwamo wabunge ni mashahidi, waliomba wafanyabiashara waruhusiwe kuuza mazao yao nje ya nchi kutokana na kuwa na mazao mengi na yalikuwa hayapati soko.

“Kupanda kwa bei (sasa) kunatokana na mahitaji yaliyopo nchi jirani za Kongo, Rwanda, Kenya, Somalia, Sudan. Hizi nchi zinategemea kupata chakula kutoka Tanzania."

Alisema nchi jirani zina uhitaji mkubwa wa chakula kutokana na serikali kuzuia wafanyabiashara kupeleka mazao nje ya nchi ili Tanzania iendelee kuwa na chakula cha kutosha hadi msimu ujao.

Alibainisha kuwa serikali ilitoa kibali cha kuuzwa kwa tani milioni 1.5 nje ya nchi na tani milioni 1.5 zilizosalia zilihifadhiwa na sasa imeruhusu ziuzwe nchini ili kupunguza gharama ya bei sokoni. 

Waziri Mkuu alisema serikali inatamani kuona mkulima anauza mazao yake kwa bei nzuri na pia chakula kinapozalishwa kwa wingi na kinauzwa kwa bei ya chini.

Akizungumzia hali ya mvua, Majaliwa alisema kwa sasa imeanza kunyesha kwenye mikoa yote na kuwataka wananchi kutumia fursa hiyo kulima mazao ya muda mfupi na yanayostahimili ukame ili msimu ujao wavune mazao mengi.

“Hakikisheni mnalima mazao ya muda mfupi ili ifikapo Machi na Aprili muanze kuvuna na kupata chakula,” alisema Majaliwa na kueleza kuwa Wizara ya Kilimo, Mifugo na Uvuvi itatoa taarifa zaidi za hali ya chakula na mazingira ya mvua kwa msimu huu wa kilimo.

Katika mkutano wake na waandishi wa habari jijini Dar es Salaam jana, Waziri wa Kilimo, Mifugo na Uvuvi, Dk. Charles Tzeba, alisema hakuna uhaba wa nafaka nchini isipokuwa "watu wameficha chakula kusubiri bei ipande zaidi".

Alisema serikali kupitia vyombo vyake, imezunguka nchi nzima kufanya utafiti juu ya hali ya chakula na kubaini kuwapo kwa chakula kingi na cha kutosha majumbani, sokoni na kwenye maghala.

“Naendelea kusisitiza kwamba hakuna uhaba wa chakula nchini, kama Mkuu wa Nchi (Rais John Magufuli) alivyotangulia kusema. 

Hali ya chakula na upatikanaji wa chakula inaonyesha bado ni ya kuridhisha na hasa upatikanaji wa mchele na maharage ikilinganishwa na mahindi,” alisema Dk. Tzeba.

“Kinachotokea hivi sasa ni kwamba bei za baadhi ya vyakula ndio zimepanda hususani mahindi, na bado kuna watu wameficha chakula ndani wanasubiri bei ipande zaidi. Wanatumia mwanya wa mwenendo wa mvua za vuli usioridhisha kupandisha bei hizo. 

"Tunaomba watoe chakula hicho kabla serikali haijachukua hatua zozote kwa sababu vyombo vyetu vimefanya kazi na tunawafahamu.

“Tunao mfumo madhubuti wa kutathmini hali ya chakula nchini, eneo kwa eneo, mkoa kwa mkoa, wilaya kwa wilaya, hali ya hewa ya nchi hii haifanani nchi nzima na kwa hiyo uvunaji ama upatikanaji wa chakula miaka yote umekuwa na utofauti kutoka eneo moja kwenda eneo jingine.

"Na siyo kwamba mavuno kila mwaka yamekuwa yakifanana katika mikoa bila kujali mvua zimenyesha sana ama hazikunyesha."

Alisema mwaka jana walitangaza halmashauri 43 ambazo hazikuvuna chakula cha kutosha, lakini maeneo mengine hakukuwa na uhaba na kwamba nchi ilikuwa na akiba ya chakula kwa zaidi ya tani milioni tatu na utoshelevu wake ulikuwa asilimia 124.

Dk. Tzeba alisema hali hiyo iliyoonyesha utoshelevu wa chakula ilileta wasiwasi kwa wakulima kwamba huenda wasipate faida na hivyo kuiomba serikali kuwafungulia soko nje huku wakiungwa mkono na wabunge.

Sawa na maelezo yaliyotolewa awali na Waziri Mkuu mjini Dodoma, Dk. Tzeba alisema hadi Oktoba mwaka jana, tani milioni 1.5 za nafaka ziliruhusiwa kwenda nje na kwamba kuanzia mwezi huo hadi sasa Tanzania imeendelea kuwa na chakula cha kutosha.

“Mwaka jana msimu kama huu bei ya mahindi kwa gunia ilikuwa wastani wa Sh. 65,000, lakini wastani wa gunia hilo kwa sasa ni Sh. 85,000. Kwa hiyo, hili ndilo linalojitokeza la kupanda kwa bei, lakini bado chakula kipo na tumezunguka nchi nzima, tunazo taarifa za kuwapo kwa chakula cha kutosha,” alisema Dk. Tzeba.

Alisema wakati bei ya mahindi ikipanda, bei ya mchele imeendelea kushuka kutokana na akiba iliyopo sokoni kuwa kubwa.

“Sababu nyingine ya kupanda kwa bei ya mahindi imetokana na wakulima kulalamika kutaka wauze mazao yao kwa tija, mpaka sasa hatuna kesi kwenye soko hata moja nchini ambalo halina mahindi, mchele, maharage isipokuwa jambo la ukweli lililopo ni kwamba mvua ya vuli mwaka huu haikunyesha kwa kiwango kilichotarajiwa, lakini kutokunyesha kwa mvua hizo siyo sababu ya kuleta upungufu wa chakula," alisema.

Aliomba wananchi kutumia vizuri akiba ya chakula iliyopo badala ya kushawishika na kupanda kwa bei.

“Kwa sababu hali hiyo hailetwi na mtu ikifikia wakati ikatokea hali kama hiyo serikali itatangaza, lakini siyo kusukumwa na watu, tuna maelfu ya tani ya chakula watu wamefungia kwenye magodauni (maghala) wanasubiri bei ipande zaidi, tunaomba biashara ifanywe kwa mbinu halali na siyo kwa mbinu chafu. 

Hali ya chakula Tanzania siyo hivyo kama watu wanavyolazimisha iwe," alisema.

Dk. Tzeba aliongeza kuwa utamaduni nao umekuwa tatizo katika baadhi ya maeneo; kwamba baadhi ya tamaduni zinashindwa kutumia aina fulani ya chakula kutokana na mazoea.

“Utamaduni nao usiwe tatizo, nasemea mfano niliouona Karagwe. Nilifika kwa mwananchi mmoja, tena mke wa diwani, ananililia anasema njaa kwamba hawakuvuna, lakini nilivyogeuka nikaona kihenge kina kama magunia 10. Nilipomuuliza akasema watoto wake wanashindwa kula (nafaka) kwa sababu wamezoea ndizi, sasa huyu ana njaa kweli?" Alihoji.

Alisema serikali inapofanya utafiti wake, hufanya kwa ujumla kwa kuangalia upatikanaji wa nafaka kwa ujumla na si vinginevyo.

Alisema wananchi wanaoshindwa kununua mahindi, wanunue mchele ambao una bei nafuu.
Read More