Mar 23, 2017

Jeshi la Polisi Laendelea kushikilia Simu Ya Tundu Lissu, Mwenyewe Afunguka..........

Nimetoka Kituo Kikuu cha Polisi Dar sasa hivi. Polisi wamekataa kunirudishia simu yangu waliyoinyang'anya kwa nguvu tarehe 6 Machi, siku waliyonikamata nikiwa mahakamani Kisutu.

Mimi sijatuhumiwa wala kushtakiwa kwa kosa lolote la mtandao chini ya Sheria ya Makosa ya Mtandao au Sheria ya Mawasiliano ya Kielektroniki na Kiposta.

Badala yake nimeshtakiwa kwa makosa ya uchochezi yanayohusiana na kauli zangu juu ya Serikali ya Rais Magufuli. Aidha, nimeshtakiwa kutokana na msimamo wangu na kauli zangu juu ya siasa za Zanzibar na masuala ya Muungano.

Kwa sababu hizi, Jeshi la Polisi halikuwa na, na halina, sababu wala haki ya kuchukua simu yangu na kuendelea kukaa nayo hadi sasa, siku 17 baadae.

Nimepata taarifa kwamba tangu walipoichukua kwa nguvu karibu wiki tatu zilizopita, simu hiyo imekuwa inaonekana inatumika kwa mawasiliano ya whatsapp.

Maana yake ni kwamba polisi wanasoma na au kusikiliza mawasiliano yangu ya simu na ya kielektroniki. Hii ni kinyume cha sheria za nchi yetu.

Simu hiyo ni chombo changu cha mawasiliano ya kikazi na binafsi. Kama mbunge, ninaitumia simu hiyo kwa ajili ya mawasiliano yangu na wananchi walionichagua na viongozi wengine wa kiserikali na kichama.

Jeshi la Polisi halina haki ya kujua au kuingilia mawasiliano hayo.

Kama wakili ninatumia simu hiyo kwa ajili ya mawasiliano na wateja wangu, wengi wao wakiwa na kesi mahakamani dhidi ya Jeshi la Polisi au Serikali hii.

Mawasiliano hayo yanalindwa kwa mujibu wa sheria na polisi hawana sababu wala haki ya kujua au kuingilia mawasiliano hayo na wateja wangu.

Vile vile ninatumia simu yangu kwa mawasiliano yangu binafsi na familia yangu, marafiki zangu na jamaa zangu wengine.

Mawasiliano haya nayo yanalindwa na Katiba yetu na polisi hawana sababu wala haki ya kujua au kuingilia mawasiliano hayo binafsi.

Kwa vyovyote vile, kitendo cha Jeshi la Polisi kuchukua na kuendelea kuishikilia simu yangu bila sababu wala haki ni mfano mwingine wa matumizi mabaya ya mamlaka ya kiupelelezi ya Jeshi hili la Polisi.

Badala ya kushughulikia wahalifu wa wazi kama akina Daudi Bashite na wenzake, polisi wetu wanahangaika na viongozi waliochaguliwa na wananchi wanaotumia haki na wajibu wao kikatiba kuikosoa serikali ya Rais Magufuli kwa sababu ya matendo yake ya hovyo.

Ninafahamu polisi wanafikiri kwamba kwa kunifanyia vitendo hivi basi nitaogopa na kulegeza msimamo wangu katika masuala mbali mbali yanayolisibu taifa letu.

Ninawaomba wajiulize kwa nini imeshindikana hadi sasa kulegeza msimamo wangu huo kwenye masuala hayo, licha ya kunikamata na kuninyanyasa mara nyingi kwenye vituo vya polisi na mahakamani. Sitishiki na sitatishika na mambo yao haya.

Hata hivyo, naomba niseme wazi ili mwenye kusikia na asikie. Vitendo hivi vya Jeshi la Polisi havifai na vinatakiwa kukoma kabisa. Polisi wanirudishie simu yangu mara moja na bila masharti yoyote.

Ninaendelea kutafuta mawasiliano ya IGP Mangu na wakubwa wenzake ili wanieleze kwa nini simu yangu inashikiliwa na maofisa wao.

Endapo na wao watashindwa kutoa maelekezo sahihi kwa waliochukua simu yangu na wanaendelea kukaa nayo, nitalazimika kwenda Mahakama Kuu ili kuomba mahakama iingilie kati na kutamka kama ni sahihi kisheria kwa mapolisi wa nchi hii kuingilia mawasiliano ya sisi wananchi kwa namna ya hovyo namna hii.

Naomba mnaopata ujumbe huu mnisaidie kupaza sauti zetu ili matendo haya mabaya yakome katika nchi yetu.
Wasalaam,

Mh. Tundu AM Lissu
Read More

Ziara Ya Kushtukiza Ya Rais Magufuli Bandarini Leo Na Kuzuia Makontena 20 Yenye Mchanga Wa Madini Uliokuwa Usafirishwe kwenda Nje Ya Nchi

Rais wa Jamhuri ya Muungano wa Tanzania Mhe. Dkt. John Pombe Magufuli leo tarehe 23 Machi, 2017 amefanya ziara ya kushtukiza katika bandari ya Dar es Salaam kwa lengo la kufuatilia utekelezaji wa maelekezo aliyoyatoa kwa nyakati tofauti juu ya kudhibiti udanganyifu wa mizigo inayoingia na kutoka nchini kupitia bandari hiyo ikiwemo usafirishaji wa mchanga wa madini kwenda nje ya nchi.

Katika ziara hiyo Mhe. Rais Magufuli ameshuhudia makontena 20 ya mchanga wenye madini kutoka kwenye migodi iliyopo kanda ya ziwa ambayo yamezuiliwa kusafirishwa nje ya nchi tangu alipotoa agizo la kupiga marufuku usafirishaji wa mchanga nje ya nchi tarehe 02 Machi, 2017.

Pamoja na kushuhudia makontena hayo, Mhe. Rais Magufuli amemuagiza Mkuu wa Jeshi la Polisi Nchini IGP - Ernest Mangu na vyombo vingine vya dola kuhakikisha mchanga wa madini unashikiliwa popote ulipo, mpaka hapo uchunguzi wa kina utakapofanyika kubaini ukweli.

“Nataka niwaambie nchi yetu inachezewa mno, nimekuja kuyaona haya makontena kama yapo, na kweli nimeyaona, sasa utaratibu utakapokamilika nataka Watanzania na dunia nzima ione kilichomo humu ndani kama ni mchanga kweli ama dhahabu” amesema Mhe. Rais Magufuli.

Akiwa bandarini hapo Mhe. Dkt. Magufuli pia ameshuhudia udanganyifu mwingine unaofanywa na wafanyabiashara wanaoagiza mizigo kutoka nje ya nchi baada ya kuoneshwa makontena ambayo nyaraka zinaonesha yamebeba mitumba ya nguo na viatu wakati ndani yake kila kontena moja limebeba magari matatu ya kifahari.

Maafisa wa bandari ya Dar es Salaam na Mamlaka ya Mapato Tanzania (TRA) wamemueleza Mhe. Rais Magufuli kuwa kufuatia maelekezo aliyoyatoa ya kuhakikisha mizigo yote inakaguliwa kwa mitambo ya mionzi (Scanning Machines) wamefanikiwa kubaini udanganyifu mwingi unaofanywa na wafanyabiashara wanaoingiza nchini na kusafirisha nje ya nchi mizigo mbalimbali yakiwemo makontena 10 ambayo yamepatikana yakiwa na magari ya kifahari ilihali nyaraka zake zikionesha yana mitumba ya nguo na viatu.

Mhe. Rais Magufuli amewapongeza maafisa na wafanyakazi wa bandari ya Dar es Salaam na TRA kwa kazi nzuri wanayofanya kudhibiti upotevu wa fedha za umma bandarini hapo na amewataka kuendelea kutekeleza wajibu wao kwa uzalendo na kujiepusha na rushwa.

“Leo mmenifurahisha sana, ninawatia moyo endeleeni kuwakamata wote wanaofanya udanganyifu huu na muwachukulie hatua kali za kisheria, lakini msimuonee mtu na msipokee rushwa, tunataka watu wajifunze kuwa hapa sio shamba la bibi” amesisitiza Rais Magufuli.

Aidha, ametoa wito kwa vyombo vyote vinavyoshughulikia udhibiti wa mizigo inayoingia na kutoka kupitia bandari ya Dar es Salaam na bandari nyingine hapa nchini, kuendelea kushirikiana ili kukomesha vitendo vyote vya udanganyifu ambavyo vinasababisha nchi kupoteza mapato mengi.

Gerson Msigwa
Mkurugenzi wa Mawasiliano ya Rais, IKULU
Dar es Salaam

23 Machi, 2017
Read More

VIDEO: Nape Nnauye Akiongea Kwa Uchungu Baada ya Mkutano wake Kuzuiwa na Kisha Kutishiwa Bunduki

Aliyekuwa Waziri wa Habari, Nape Nnauye amezungumza na Waandishi wa habari akiwa juu ya gari lake leo maeneo ya St. Peter Osterbay Dar es salaam ikiwa ni saa chache baada ya taarifa kutoka Ikulu kutangaza kwamba uteuzi wake umetenguliwa.

Hali hiyo imetokana na Jeshi la Polisi kuuzuia mkutano huo ambapo RPC Kinondoni alifunga barabara kwa gari huku Nape akitishwa kwa Bunduki.
==>Msikilize hapo chini akiongea
Read More

VIDEO: Nape Akidhibitiwa na Polisi Baada ya Mkutano wake Kupigwa Marufuku

Mtazame hapo chini Mbunge Nape akiamriwa kurudi ndani ya gari mara tu alipofika katika Hoteli ya Protea kwa ajili ya kuzungumza na waandishi wa habari.

Rais Magufuli leo ametengua uteuzi wa Nape na Kumteua Mwakyembe kuchukua nafasi hiyo.
==>Tazama video hiyo hapo chini
Read More

Askofu Gwajima Afunguka chanzo cha Nape Nnauye Kutumbuliwa na Rais

Askofu Mkuu wa Kanisa la Ufufuo na Uzima,Josephat Gwajima amesema kuwa yeye ndiye sababu kubwa ya kutenguliwa kwa Waziri wa habari,utamaduni,Sanaa na Michezo Nape Nnauye.

Akizungumza leo (Alhamisi) baada ya kutembelea Ofisi za kituo cha redio cha Efm,Gwajima amesema Mkuu wa Mkoa alivamia ofisi za Clouds kwa lengo la kutaka wamchafue Askofu huyo lakini baada ya Nape kuunda tume iliyofanya uchunguzi kumesababisha kutenguliwa kwake.

"Labda niseme kuwa sababu za Nape kutenguliwa zinanihusu sana mimi, Cha kujiuliza ni kwamba ni nani alikuwa nyuma ya Mkuu wa Mkoa alipovamia Clouds hadi Nape atenguliwe?”alihoji.

Gwajima alifika Ofisini hapo saa 4:06 na kukutana na viongozi na wafanyakazi huku akiwapa pole na kuwatia moyo na kwamba watayashinda majaribu yanayoikumba tasnia ya habari.
Read More

Mar 4, 2017

Alichosema Mbunge Godbless Lema baada ya kuachiwa Huru kwa dhamana

Hatimaye Mahakama Kuu Kanda ya Arusha imemuachia kwa dhamana Mbunge wa Arusha Mjini kupitia CHADEMA, Godbless Lema baada ya kusota gerezani kwa zaidi ya miezi minne.

Mahakama hiyo imefikia uamuzi huo baada ya kupitia hoja za pande zote mbili zilizowasilishwa mahakamani hapo leo na kuamua kuzitupitilia mbali hoja za upande wa serikali za kumnyima Lema dhamana.

Hatua hiyo imekuja ikiwa ni siku chache kupita tangu mahakama rufaa kutupilia mbali rufaa ya jamhuri, huku ikishangazwa na hatua ya Lema kukosa dhama hadi wakati huo.

Mbunge huyo ameachiwa kwa dhamana yenye masharti ya wadhamini wawili wanaoaminika pamoja na kusaini bondi ya shilingi milioni 1 ambapo nje ya mahakama Lema ametoa shukrani zake kwa wote waliohusika na kubainisha kuwa serikali haikuwa na nia njema na yeye, lakini yeye amesimama na Mungu.

"Ninamshukuru sana mwenyezi Mungu, mke wangu, familia yangu, mawakili, viongozi wa chama na wananchi wote waliokuwa na mimi. Na kwa namna ya pekee mke wangu, kama ningepata nafasi ya kuoa tena, ningemuoa yeye. Pia mtoto wangu alifikia hatua akasema anatamani kufanya kosa ili aje alale na mimi gerezani, na akauliza ni kosa gani afanye ili aletwe gerezani" Amesema Lema

Kwa upande wa wakili wake Peter Kibatala amesema hatimaye kazi ya kwanza ya kuhakikisha Lema anapata dhamana imekamilika na kwamba sasa wanajipanga kwa ajili ya kushughulika na kesi ya msingi.

Kwa niaba ya CHADEMA, Mwenyekiti wake Freeman Mbowe, amelaani nguvu iliyotumiwa na jeshi la polisi siku ya leo ya kuwapiga, kuwakamata na kuwatawanya wafuasi wa chama hicho waliofika mahakamani hapo kufuatilia kesi ya mbunge wao, huku akitangaza kuwa kwa leo hakutakuwa na tukio lolote la kisiasa mpaka watakapotangaziwa tena.

Read More

Rais Magufuli amtia kitanzini mkandarasi wa maji......Aagiza Kushikiliwa Kwa Hati Zake za Kusafiria

Rais wa Jamhuri ya Muungano wa Tanzania Mhe. Dkt. John Pombe Magufuli, ameagiza kushikiliwa kwa hati za kusafiria za mwakilishi wa kampuni ya ukandarasi ya Overseas Infranstructure Alliance Private Limited ya India Bw. Rajendra Kumar pamoja na wasaidizi wake mpaka hapo kampuni hiyo itakapokamilisha ujenzi wa mradi wa maji wa Ng'apa Mjini Lindi ambao ulipaswa kuwa umekamilika tangu tarehe 17 Machi, 2015.

Mhe. Rais Magufuli ametoa agizo hilo leo tarehe 03 Machi, 2017 alipotembelea mradi huo ambao unatarajiwa kuzalisha zaidi ya lita za ujazo milioni 5 za maji kwa siku kwa ajili ya wakazi wa Mji wa Lindi ambao wanakabiliwa na tatizo kubwa la maji.

Mhe. Dkt. Magufuli ameelezea kusikitishwa na usimamizi mbaya wa mradi huo ambao tayari kiasi cha Shilingi Bilioni 21.8 zimetolewa kati ya Shilingi Bilioni 29 zilizopangwa kutumika hadi kukamilika kwake, na ameonya kuwa endapo mradi huo hautakamilika katika kipindi cha miezi 4 kuanzia sasa atachukua hatua dhidi ya wanaopaswa kuusimamia.

"Ikipita miezi minne nisilaumiwe, hatuwezi kukubali wananchi wa Lindi wanashida ya maji, fedha zimetolewa, mkandarasi anaamua kupeleka fedha India, mradi umecheleweshwa kwa miaka miwili na mkandarasi hayupo kwenye eneo la ujenzi halafu mnaopaswa kumsimamia mnamuangalia tu wakati sheria zipo, kwa nini hamkumfukuza muda wote huu?" amehoji Mhe. Rais Magufuli.

Mapema akitoa maelezo kuhusu mradi huo Waziri wa Maji na Umwagiliaji Mhandisi Gerson Lwenge amesema mradi huo unatekelezwa kwa mkopo kutoka Benki ya Maendeleo ya Ujerumani (KFW) na Jumuiya ya Ulaya (EU) ambapo hadi sasa umefikia asilimia 85 na kwamba mkandarasi amesimamisha kazi kutokana na kuishiwa fedha.

Wakati huo huo, Mhe. Rais Magufuli amekutana na kufanya mazungumzo na Bodi ya Wakurugenzi wa Benki ya Maendeleo ya Afrika (AfDB) na ameiomba bodi hiyo ishirikiane na Tanzania kutekeleza miradi mikubwa ya uzalishaji wa umeme na ujenzi wa reli ya kati kwa kiwango cha kisasa "Standard Gauge".

Pamoja na kutoa ombi hilo Mhe. Dkt. Magufuli ameipongeza benki hiyo kwa kutoa mikopo nafuu iliyowezesha kutekelezwa kwa miradi mingi ya maendeleo hapa nchini hususani ujenzi wa barabara lakini ameomba mchakato wa upatikanaji wa mikopo hiyo urahisishwe na kuharakishwa ili miradi mingi zaidi itekelezwe kwa wakati.

"Hapa Tanzania AfDB imefanya mambo makubwa sana, tunaipenda sana benki hii kwa sababu imetuwezesha kujenga barabara nyingi zikiwemo ya Iringa - Dodoma inayounganisha Cape Town Afrika Kusini hadi Misri, barabara ya Namtumbo - Tunduru - Masasi na nyingine nyingi, kwa kweli hawa ni wadau muhimu wa maendeleo" amesema Mhe. Rais Magufuli.

Akizungumza baada ya kikao hicho kiongozi wa Bodi ya Wakurugenzi waliokutana na Mhe. Rais Magufuli katika Ikulu ndogo ya Lindi Bi. Lekhethe Mmakgoshi amempongeza Mhe. Dkt. Magufuli kwa juhudi zake za kuleta mageuzi ya kiuchumi nchini Tanzania na ameahidi kuwaAfDB itaendelea kuwa mshirika muhimu wa maendeleo ya Tanzania ikiwemo kufanyia kazi  maombi aliyoyatoa kwa Bodi hiyo.

Nae Dkt. Namajeje Weggoro ambaye ni mmoja wa wakurugenzi hao anayewakilisha nchi saba za Afrika ikiwemo Tanzania amesema Tanzania ni nchi inayoongoza kwa kupata mikopo mingi kutoka AfDB na ameongeza kuwa maombi yaliyotolewa na Mhe. Rais Magufuli yatapewa kipaumbele.

Gerson Msigwa
Mkurugenzi wa Mawasiliano ya Rais, IKULU
Lindi
03 Machi, 2017
Read More

Watuhumiwa 11,503 wa dawa za kulevya watiwa mbaroni

Waziri Mkuu, Kassim Majaliwa amesema jumla ya watuhumiwa  11,503 wa uzalishaji, usambazaji, uuzaji na utumiaji wa dawa za kulevya wamekamatwa kwa kipindi cha Julai mwaka jana hadi Januari mwaka huu nchini.

Akizungumza leo katika kikao cha Baraza la Mawaziri cha kwanza tangu Serikali kuhamia mjini Dodoma, Majaliwa amesema katika kipindi hicho kesi za kujibu zilikuwa ni 9,811 ambapo watuhumiwa 941 walikutwa na kesi za kujibu huku 238 wakiachiwa huru na kesi 478 bado zinaendelea mahakamani.

Kuhusu pombe za viroba, Majaliwa  amesema oparesheni inaendelea katika mikoa mbalimbali baada ya kupigwa marufuku March Mosi mwaka huu na kwamba kupitia oparesheni hiyo wamegundua mambo mengine ikiwemo uwepo wa makampuni yaliyokuwa hayalipi kodi.

Kwa upande wa ajenda za kikao hicho cha mawaziri, Majaliwa amesema wizara zitatoa takwimu za watumishi wangapi waliohamia, idadi ya watumishi wote,  wamepanga awamu ngapi za kuhamia Dodoma .
Read More